Blog del Serviciu de Normalización Llingüística de la Comarca de la Sidra
Un stand los Servicios de Normalización Llingüística nos Conceyos va tar presente a lo llargo de los díes que dura'l Festival avilesín Beltaine. El puestu va contener una amuesa de lo que se vino faciendo nestos años que lleven funcionando los servicios.
La Compañía de Llangréu TEATRU KUMEN clausura güei, día 24, a les 20:30 na Sala Loreto de Colunga, los XIV ALCUENTROS COLA CULTURA TRADICIONAL D·ASTURIES cola escenificación de la obra "JACINTO Y MONCHINA"
L'espectáculu ye parte, al par, de la III Muestra de Teatru Amateur del Principáu d'Asturies que promueve la Federación de Grupos de Teatru Amateur d'Asturies (FETEAS) cola collaboración de la Conseyería de Cultura y Turismu y de dellos conceyos, como'l de Colunga.
Con 28 obres al llombu, depués de cuasi trenta años dende'l so aniciu, KUMEN ofreznos esta nueva puesta n'escena, protagonizada por Jacinto'l de Fresnéu, ún de los personaxes principales de "La Aldea Perdida", cola diferencia de que KUMEN pon a esti personax dientro d'una nueva hestoria, na que Jacinto ye un mozu ilustráu, zarráu nun pueblín asturianu, qu'escribe poesía y afux del trabayu en campu.
Mamy Carter ofrez esti sábadu 25 de xunetu un conciertu nel Teatru Riera de Villaviciosa a les 21 hores, con entrada de baldre.
El conciertu d’esti sábadu va ser un conciertu de rock alternativu al mou de los noventa, con bases rítmiques, samplers y referencies sonores de películes acompañaes de proyeiciones a cargu d’Alejandro Camblor.
El grupu ta formáu por Carlos Felipe Valdés (baxu y voz), Daniel García(guitarra y coros), Willy Lorenzo (guitarra y voz) y Jason Martínez (batería).
Mamy Carter fórmase en Mieres en 1993. El so conciertu en Villaviciosa,entamáu pol área de cultura del conceyu, ye parte de la so vuelta a los escenarios tres d’una trayectoria brillante nel rock de los 90.
Anguaño’l grupu ta preparando temes nuevos nel so vieyu local d’ensayu siguiendo cola so virtú de movese n’estremaos terrenos estilísticos que llenden al norte con Sugar, al sur con Pavement, al este con Guided by Voices y al oeste cola llibertá de nun quedar etiquetaos n’etiquetes fates.
Güei a mediudía presentamos, nes instalaciones de Protección Civil-Salvamentu de la playa Rodiles, la Campaña Informativa Sobre Midíes de Seguridá en Playes y Cadena de Sobrevivencia, entamada por esti serviciu cola ayuda de la Conseyería de Cultura y Turismu. La campaña, col eslogan “Na mar... ¡Nun sías calamar!”, ta compuesta de materiales que se van repartir per diversos llugares de la costa de la comarca y que contienen conseyos preventivos, midíes d’autoprotección en casu d’accidente nes playes, pautes d’actuación en primeros auxilios, etc., cola novedá del usu normalizáu de la llingua asturiana pa esti fin preventivu, continuando campañes en castellán entamáes n'años anteriores pol 112.
Organizáu pola Banda de Gaites Villaviciosa, esti sábadu 18 y domingu 19 en Villaviciosa, na Plaza’l Güevu, va celebrase’l IV Festival de Bandes de Gaites Maliayo, que va cuntar con pasucáis y actuaciones de delles bandes de gaites asturianes y llegaes dende fuera d'Asturies, amás de l'actuación de Jim Kilpatrick.
Inxertáu dientro del programa CREACIÓN del Serviciu de Mocedá de la Comarca de la Sidra, pue presentase a esti certame cualquier persona con trabayos ye llibre. Cada participante pue presentar un máximu de tres curtios desarrollaos en cualquier técnica d’animación, con un mínimu de 20 fotogrames per segundu y una duración máxima de 15 minutos.
Hai un premiu al meyor curtiu de 1200 euros y un áccesit mención especial del xuráu que va llevar 500 euros. Les bases completes podeis atopales equí.
Güei, xueves 9 de xunetu, nel campu de fútbol de Grandiella, va celebrase la primer edición del recién creáu Festival de Pop-Rock Villa de Nava. Nél van tar presentes los grupos Dirección Sur, Delagua, Muñeco Vudú y Alto Volto.
Dirección Sur ye una banda de pop liderada pola cantante Ana Hevia y el guitarrista Víctor Magadán que ta presentando en directo los temes que componen el so últimu discu hasta’l momentu, tituláu "A sólo un pasu". Delagua son una banda de pop-rock fusión creada hai nueve años poles hermanes Gema y Silvia Fernández, que faen una mezcla de dellos estilos (pop, rock, reggae, rumba, funk, etc.) y que tienen espublizaos dos discos, l’últimu col nome de "De frente nesti mesmu añu". Muñecu Vudú son un quintetu que vien trabayando dende l’añu 2007 y que basa la so música na mezcla de rock, funk y otros ritmos del mundu (rock, swing, reggae…); d’equí a poco van escomenzar una xira pel Estáu. Alto Volto son un tríu de hard rock influenciáu principalmente por bandes ingleses y americanes de los 70 y 90.
L’asociación Xareos! y la revista Formientu, en collaboración cola editorial La Cruz de Grau, convoquen el I Certame de Microrrellatos Mozos «Formientu» “col envís d’afalar la creación lliteraria ente los escritores más mozos y ayudalos a esplorar les sos posibilidaes”. El plazu ta abiertu hasta’l 31 d’agostu d’esti añu.
La escritura de microrrelatos mínimos ye, según los responsables de la revista Formientu, “ un exerciciu perfectu pa desendolcar esa capacidá de síntesis y suxestión capaz de impactar al llector y dexalu prendáu d’una historia”, ye por ello que convoquen esti concursu nel que puen participar toes aquelles persones nacíes de 1975 n’adelantre, con un númberu ilimitáu de microrrellatos, de tema llibre y escritos n’asturianu.
Esti vienres 10 de Xunetu inaugúrase una nueva edición de los Alcuentros cola Cultura Tradicional d'Asturies de Colunga, que van durar hasta'l vienres 24 y al rodiu de que tan programaes una buena riestra d'actividaes de les que diremos informando.
De mano, pa esti fin de selmana va celebrase'l V Mercáu Tradicional nos Alcuentros, na Plaza l'Ayuntamientu, qu'inclúi puestos d'artesanía y productos agroalimentarios, complementáu con talleres d'oficios artesanales, actuaciones folklóriques, xuegos tradicionales y aiciones teatrales, amás d'un Festival de Canción Asturiana, el sábadu a les siete y media, nel que van actuar Faustino Braña, Laudelina Hortal y José Manuel García Álvarez, acompañaos a la gaita por Armando Fernández Robledo.
Durante tol tiempu que duren los alcuentros va tar espuesta na Sala Loreto la esposición "ANTONIO MEDIO, ACTOR Y BARÍTONU ASTURIANU", una muestra compuesta por catorce paneles esplicativos al rodiu de la vida y obra d'esti artista xixonés, nacíu en 1912 y muertu en 1977.
Fonte: Área de Cultura y Biblioteca del Conceyu de Colunga.
La obra del clásicu Lope de Vega aporta al Riera de Villaviciosa con "Quien todo lo quiere..." esti vienres 10 de xunetu a les ocho y media de la tarde.
L’aula de teatru de la Universidá d’Alicante va ser l’encargáu d’echar n’escena esta prestosa comedia de la madurez creativa de Lope, qu'anda al rodiu de la entrega y l’egoísmu, con personaxes secundarios enllenos de remangu y chancia. La propuesta del montaxe amiesta al versu de Lope una banda sonora qu’interpreten en vivo.
Fonte: OIX Villaviciosa
El miércoles y xueves d'esta selmana, a partir de les 18:30 hores, la Plaza l'Ayuntamientu de Villaviciosa va convertise nel Güevu Stadium p'acoyer una de les actividaes más llamatives del programa d'ociu xoven Enredar: deporte na cai. Nesta ocasión toca-y el turnu al fútbol, el minitenis y el floorball.
Fonte: www.comarcajoven.com
El Serviciu de Mocedá de la Comarca de la Sidra yá tien abiertu'l plazu de receición d'escritos al IV CONCURSU DE MICRORRELATOS 2009-LLITERATURA COMPRIMIDA. Una convocatoria añal col sofitu de Caxastur que premia con 600 euros un relatu d'hasta 200 palabres, escritu n'asturianu o castellanu. El concursu ta empobináu a mozos y moces de menos de 35 años d'edá y pueden mandase hasta'l 30 de setiembre un máximu de dos relatos por persona.
Les bases y la tramitación completa del concursu (formulariu d'inscripción, unviu, etc.) fáense per internet en www.comarcajoven.com.
Tenéis tola información equí.
Fonte: Serviciu Mocedá Comarca de la Sidra
Coincidiendo colos actos de la víspora del Festival de la Sidra, ta programada, de mañana martes día 7 al xueves 9 de xunetu, una exhibición de grafiti nes parés de la muria de la estación, na que dellos de los meyores grafiteros d'Asturies van de xuru facer un poco más guapu a la vista pa en delantre esti requexu de la villa, complementando los murales que yá fechos n'años anteriores.
La fiesta que Bimenes entama tolos años pa recordar la declaración d'oficialidá del asturianu qu'alcordó'l Conceyu'l 4 de xunetu de 1997 llega esti añu a la so XIII edición.
Esti sábadu día 4 de xunetu va axuntar la mayor parte de les actividaes festives programaes, que se van desarrollar a lo llargo de tol día.
Nel prau la fiesta, en Martimporra, a les once de la mañana, empieza la VII Feria d'Artesanía y Mercáu de Productos Agroalimentarios.
Una hora depués, los grupos folclóricos Los Yerbatos (Bimenes), Oter de Fumos (Valladolid) y el grupu de Pauliteiros dos Professores (Miranda del Douro) van facer un pasucáis hasta la Casona de los Careaga, onde l'escritor Roberto González-Quevedo González va lleer el pregón de les fiestes.
A la una ye la misa n'asturianu, oficiada por José Manuel García de Jesús y cantada pol Corriellu la Pandorga. Media hora más tarde, nel prau de la fiesta va facese la puya'l ramu y los grupos folclóricos van animar la fiesta coles sos actuaciones.
Alredor de les tres empieza la xinta popular, con un menú a base de bollu preñáu, empanada, casadiella y arroz con lleche. La tarde sigue con talleres de manualidaes pa los más pequeños y sigue a les 18:30 hores cola décima edición del Concursu de Gaiteros y Gaiteres Mozos. El ramu a la fiesta van ponelu dende les once de la nueche les actuaciones de Los Gatos del Fornu y Los Ciquitrinos, y , pa rematar, DJ - J15 va animar los últimos momentos de la fiesta.
Continúen los actos programaos dientro del 32 festival de la sidra de Nava, qu'esti añu cunta, per primer vez, con un programa y publicidá n'asturianu dafechu.
Pa güei vienres 3, , a les 21:00 hores, ta prevista una representación de teatru na cai. Concretamente va ser na Plaza Manuel Uría, onde la compañía MDM va poner n’escena la obra titulada La viuda astuta del autor Carlo Goldoni (Venecia, 1707 - París, 1793), consideráu ún de los padres de la comedia italiana. Como si d’un chiste se tratara, Goldoni presenta a un francés, un español y un italianu (colos sos rasgos típicamente característicos) enfotaos en namorar a Rosaura, una moza recién enviudada, que recibe a caún de los tres, siempre aconseyada pola so criada Marionette. Esta obra ye una muestra de la comedia d’enredos clásica del sieglu XVIII.
Per otra parte, máñana sábadu a partir de les nueve van poder oyise "Cancios de chigre y sidra" nes sidreríes La Panera, La Barraca, La Figar, La Masera, El Titi de Nava, Vda. de Angelón y El Plaza.
Fontes: Estaya d'asturianu y Conceyu de Nava
Si güei vamos poder disfrutar de l'actualización del teatru costumista asturianu con "Ello yera una vez...", a cargu del grupu de teatru Carbayín, mañana vienres, tamién na Casa la Cultura de Santuyano y a la mesma hora (20.30), tóca-y el turnu a otru xéneru tradicional como ye'l monólogu, de la mano de Carlos Alba, un de los sos cultivadores más nomaos y anovadores d'anguaño, que va actuar depués de la entrega de premios del concursu cuentos.
Llicenciáu en periodismu y actor, Carlos Alba lleva bien d'años dedicando esta última faceta al xéneru monologüísticu, con pieces como la gran "Alonsomanía", na que yá apaecen dos de los sos personaxes más míticos: Cellero, el güelu rabión; y "el Pola", mozu quinqui y tarambaina. Na Matazuga fai Alba, al mou xuglarescu, un percorríu per diferentes narraciones de la tradición oral con un filu conductor descritu pol propiu autor:
Con un primer premiu de 500 euros y dos áccesit de 200 caún a los finalistes, van poder participar nesti concursu persones de cualquier nacionalidá, de forma individual o colectiva, qu'a la fecha d'entrega de los trabayos tengan fechos los 14 años, con obres de tema llibre de guión y personaxes inéditos y orixinales, presentaes en formatu DIN A-4, tanto en blancu y negru como en color y cola estensión que l'autor quiera.
Los trabayos han entregase nel Serviciu de Normalización Llingüística de la Mancomunidá de la Comarca la Sidra (Escueles de Paraes 47 - 33529 Nava) o bien nes Oficines d'Información Xuvenil de la Comarca (Cai La Laguna, baxu 33520 Nava o Centru Cultural San Xuan de Capistrano C/Asturies 22, 33300 Villaviciosa), nun sobre zarráu nel qu'habrá de conseñase'l títulu de la obra y el seudónimu del autor. Nesti sobre inxertaráse otru, tamién zarráu (plica), nel que vengan los datos personales del autor y una copia del DNI.
El Plazu pa presentar los trabayos acaba'l 13 de Payares de 2009.
Delles obres seleicionaes van formar parte d’una esposición itinerante, como la qu'esta selmana ta espuesta na casa la cultura de Bimenes (coles obres presentaes al concursu na so edición anterior). Arriendes de lo anterior, la organización va editar una publicación coles obres premiaes.
Les bases completes tenéisles equí.
Esti xueves 2, a les ocho y media na Casa la Cultura de Santuyano, el grupu de Teatru de Carbayín va representar la so obra "Ello yera una vez...", una pieza que, según esplica'l propiu grupu na so páxina web, "cunta la historia de cuatro neños na Asturies de 1947, y de la revolución que supón nel zarráu grupu la llegada d'una neña nueva. Con ella toparán por vez primera nuevos sentimientos, como los celos, l'amor...."
"La obra ta dividía en varios cuadros independientes y a la vez rellacionaos ente si, onde se toquen temes tan asturianos como los cordobeyos, l'antroxu o l'aguilandu. Al traviés de los güeyos y xuegos de los protagonistes va descubriéndose la manera de vivir nuna dómina bien diferente de la de güei."
Tags
Esbilla
del.icio.us