el Solanu

Col envís d'editar un llibru-cartafueyu qu'antologue la lliteratura n'asturianu que se ta escribiendo anguaño na Comarca de la Sidra, el Serviciu de Normalización Llingüística de la Mancomunidá convida a tolos escritores de la comarca interesaos en participar a unviar les sos participaciones en forma de poesía (con una estensión perbaxo de los 100 versos) o rellatu breve (trés fueyes como máximu). Les collaboraciones han enviase per meil a normastur@lacomarcadelasidra.com, o bien per correu al Serviciu de Normalización Llingüística MAN.CO.SI. Paraes, nº47 33529.

Tovía hai plazu, hasta’l 13 de payares, pa presentase a la séptima edición del Concursu de Comic n’Asturianu “Comarca de la Sidra”. Nél pueden participar persones de cualquier nacionalidá, mayores de 14 años, con obres orixinales de tema y técnica llibre, con testos escritos n’asturianu. Los trabayos han entregase nel Serviciu de Normalización Llingüística de la Mancomunidá de la Comarca de la Sidra o nes Oficines d’Información Xuvenil de la comarca. Les bases completes podéis atopales na Web del Serviciu de Mocedá de la Comarca.

Pa quien nun la pudo ver nel reciente Festival del llibru infantil y xuvenil, la esposición al rodiu de la obra de Berta Piñán Arroz, agua y maíz va tar estes selmanes na casa la cultura-biblioteca Maria Josefa Canellada, en Santolaya (Cabranes).

UMBRAL 2009
El Conseyu Comarcal de Muyeres de la Comarca de la Sidra entama esta
iniciativa llamada UMBRAL, que tien l’oxetivu d’implicar a entidaes,
empreses y particulares nes actuaciones y actos organizaos pol Conseyu,
col envís de sensibilizar pa la igualdá d’oportunidaes ente muyeres y
homes. UMBRAL 2009 tien la idea d’implicar nesta ocasión al sector
artesanal de la Comarca de la Sidra, polo que convoca a participar a toles
muyeres inscrites nel Rexistru d’Empreses y Talleres Artesanos del
Principáu d’Asturies a participar con una pieza na primer edición d’esta
iniciativa. La convocatoria ta abierta a artesanes y artesanos de toles
especialidaes, que van poder participar de forma individual o colectiva,
con una pieza única, non seriada, fecha sobre’l tema “La violencia
escontra les muyeres”.
Les pieces pueden presentase na sede de la mancomunidá del 1 al 13 de
Payares, y con elles fadráse una
esposición itinerante que va recorrer los distintos espacios y centros
culturales, amás de formar parte d’una publicación divulgativa sobre la muestra. Les bases completes podéis atopales en http://www.comarcajoven.com/ficheros/BASES_UMBRAL.pdf

Una trentena d’actividaes distintes ye lo que propón ENREDAR na Seronda pa estos meses d’ochobre, payares y avientu. Xunto con tola propuesta d’ociu y cultura qu’ufierta la Casa la Cultura Marta Portal, el Serviciu de Deportes, el telecentro y otres estayes del Ayuntamientu, completen una gran ufierta de propuestes pa esti fin d’añu. El programa completu podéis atopalu en www.comarcajoven.com

Villaviciosa va acoyer, del xueves 15 d’ochobre al domingu 18, el primer Festival del llibru infantil y xuvenil n’asturianu, organizáu pola conseyería de Cultura y Turismu cola collaboración del gremiu d'editores d'Asturies, la Comarca de la Sidra y el conceyu de Villaviciosa. Esti eventu inclúi gran cantidá d’actividaes que van protagonizar l’axenda cultural de la Comarca pa esti fin de selmana. Va a haber esposiciones, presentaciones de llibros, talleres y actuaciones músicales (ente ellos los de Tejedor y Alfredo González), too ello nel PATIU DE LES ESCUELES GRADUAES, al par del teatru Riera. El programa completu podéis atopalu en www.lacomarcadelasidra.com.

Dientro del so programa de cursos d'alfabetización, l'academia de la llingua va entamar, en xunto cola Asociación Folklórica y Cultural Los Yerbatos, un cursu de llingua pa persones adultes en Bimenes. El cursu va impartise na casa la cultura de Santuyano del 6 d'ochobre al 3 d'avientu, los martes y los xueves de 18:00 a 20:00 hores, y ta abiertu a tolos interesaos, que namás tendrán que pagar los materiales didácticos.

L’Área de Cultura del Conceyu de Villaviciosa, dientro de la programación del Teatru Riera, ofrez la presentación en castellán de la obra “La Balada de Oscar Wilde”, a cargu del actor Sergi Mateu, conocíu pola so participación na serie “Hospital Central”.
Va ser el sábadu 3 d’ochobre a les 20:30 h. y Domingu 4 d’ochobre a les 19:00. La entrada de baldre pa tolos pases, previa retirada d’ella nel mesmu Teatru (Oficina de Turismu) nos díes y horarios siguientes: Miércoles 30 de Setiembre, de 10.30 a 14.00 y de 15.30 a 17.30 h.
Ruégase máxima puntualidá. Una y buenes entame la función, nun va poder entrase na sala.

Fonte: OIX Villaviciosa