el Solanu

L'Aula de Villaviciosa yá tien abiertu'l plazu de matricula pa dellos cursos: Preparación de pruebes p'algamar el títulu de Graduáu en Secundaria o pa entrar en Ciclos Formativos de Grau Mediu. Tamién hai cursos d'Inglés y d'Español pa Estranxeros. Les clases son de baldre y n'horariu de mañana. La matrícula pue facese hasta'l 29 de setiembre de llunes a xueves, de 11 a 13 hores nel Atenéu de Villaviciosa. El teléfonu d'información ye 629217667.

Entá ta abiertu'l plazu pa los distintos concursos qu'entren dientro'l programa CREACIÓN, entamaos pol Serviciu de Mocedá de la Comarca de la Sidra col sofitu de Caxastur. Pal de curtiometraxes d'animación y el de microrellatos (al que pueden presentase testos en llingua asturiana) el plazu pieslla'l 30 d'esti mes. Hai un poco más de tiempu nel casu del de CÓMICS N'ASTURIANU, pal que se pueden presentar trabayos hasta'l 13 de Payares. Les bases completes de toos elles podéis consultales equí.

L'activa asociación de muyeres "Conceyar" entama otra vuelta colos sos cafés-coloquiu. Pa esti vienres 18 de setiembre, a les 19:30, tienen programáu'l primer de la temporada, col tema "Afondamientu nel venceyu solidariu con Nicaragua", que cunta cola participación de miembros d'Ayuda en Acción y al que pueden acudir tolos que tean interesaos.

La cultura, l'artesanía y los productos tradicionales asturianos van tar presentes esti fin de selmana nel primer mercáu tradicional de La Puente Arriba, en Grátila (Nava), que va dir acompañáu xuegos, representaciones, rifes y música. El programa completu podéis velu equí.

La música cantada n'asturianu va tener el so sitiu nes fiestes del Portal, qu'entamen esti vienres que vien en Villaviciosa, día nel que un bon collaborador d'esti serviciu, Lluis Portal, va ser l'encargáu de dar el pregón de los festexos.

El llunes 14 de setiembre a les 21:00 hores el cantautor asturianu Rafa Lorenzo, acompañáu d'un grupu de músicos y actores va presentar el so conciertu espectáculu VOI PA LA BRAÑA. El más puru folk vaqueiru,entreteníu y danzarín, acompañáu col recitáu de dellos
poemes del Padre galo y l'acabante de fallecer Nené Losada, faciendo
tamién homenaxe a la xuglaresa de les brañes Rogelia Gallo "la vaqueira".

Aparte d'ello, el martes 15, dientro de la programación de conciertos que pa les fiestes tien programaes la cervecería La Bodega, va tar dedicáu a los grupos n'asturianu, cola actuación del La Tarrancha, Skama La Rede, K-Nalón y Gomeru a partir de les 21:30.

El Conceyu de Parres ta acabante d'entrar nel llistáu de 40 conceyos qu’oficializaron yá la so toponimia, ente los que yá s'alcuentren tamién dende va tiempu tolos qu'integren la Comarca de la Sidra. Les nueves denominaciones, aprobaes pola Xunta de Toponimia primero, pasen a tener la consideración de denominaciones oficiales. Ente elles recuéyese, por exemplu, el nome tradicional Les Arriondes pa la capital.

20 conceyos más tienes abiertu’l procesu pa normalizar l’usu de la so toponimia tradicional al traviés de la so oficialización.

La organización de L'Arribada y l'asociación maliaya La Compaña del Ronchel axúntense esti añu pa organizar una xornada en Villaviciosa que se va desarrollar en setiembre y que va tener como tema de fondu la ría y la mar. En concretu será'l día 14 de setiembre -coincidiendo col llunes de les fiestes d'El Portal- y tendrá llugar na sala polivalente del Teatru Riera. Presentaráse una novela, habrá varies comunicaciones y l'homenaxe a un personax del conceyu.

El vienres que vien, 7 d'agostu, la Coral Capilla La Torre de Villaviciosa va abrir el ciclu Clásicos del Branu con un conciertu a les 20.30 hores nel Teatru Riera de Villaviciosa.
Van segui-y el sábadu 8 Armando Orbón y Kamal Sabri cola so orixinal propuesta de música fusión de guitarra española y sarangui de la India, nel Teatru Riera a les ocho y media.

Lleer el restu d'esta entrada

La Compañía de Llangréu TEATRU KUMEN clausura güei, día 24, a les 20:30 na Sala Loreto de Colunga, los XIV ALCUENTROS COLA CULTURA TRADICIONAL D·ASTURIES cola escenificación de la obra "JACINTO Y MONCHINA"
L'espectáculu ye parte, al par, de la III Muestra de Teatru Amateur del Principáu d'Asturies que promueve la Federación de Grupos de Teatru Amateur d'Asturies (FETEAS) cola collaboración de la Conseyería de Cultura y Turismu y de dellos conceyos, como'l de Colunga.
Con 28 obres al llombu, depués de cuasi trenta años dende'l so aniciu, KUMEN ofreznos esta nueva puesta n'escena, protagonizada por Jacinto'l de Fresnéu, ún de los personaxes principales de "La Aldea Perdida", cola diferencia de que KUMEN pon a esti personax dientro d'una nueva hestoria, na que Jacinto ye un mozu ilustráu, zarráu nun pueblín asturianu, qu'escribe poesía y afux del trabayu en campu.