el Solanu

La obra n'asturianu País de Dolfu Camilo Díaz, va ser representada esti sábadu a les ocho nel teatru Riera de Villaviciosa, baxo la direición y puesta n'escena d'Andres Presumido. País ye una de les obres fundamentales dientro del teatru escritu nos últimos años na nuestra llingua. Sotitulada como "traxicomedia asturiana", la obra constitúi una interesante reutilización dende un puntu de vista modernu de munchos elementos presentes nel teatru popular asturianu. Nella'l protagonista ye un mineru sindicalista con tolos tópicos de descreitu: vagu, blasfemu, machista, borrachu, violentu y farrucu.

El martes 4 de payares l’Academia va inaugurar na Facultá de Filoloxía d’Uviéu la edición XVIII de les sos Xornaes Internacionales d’Estudiu. Les xornaes, de llibre asistencia, y con certificáu d’asistencia pa los que s’apunten, van entamar esi mesmu día y van durar hasta’l xueves 6, dientro d’una programación enllena de conferencies alredor de la llingua y lliteratura asturiana, desde un puntu de vista tanto actual como históricu. El programa completu podéis atopalu na mesma páxina de l'academia.

Col envís d'editar un llibru-cartafueyu qu'antologue la lliteratura n'asturianu que se ta escribiendo anguaño na Comarca de la Sidra, el Serviciu de Normalización Llingüística de la Mancomunidá convida a tolos escritores de la comarca interesaos en participar a unviar les sos participaciones en forma de poesía (con una estensión perbaxo de los 100 versos) o rellatu breve (trés fueyes como máximu). Les collaboraciones han enviase per meil a normastur@lacomarcadelasidra.com, o bien per correu al Serviciu de Normalización Llingüística MAN.CO.SI. Paraes, nº47 33529.

Tovía hai plazu, hasta’l 13 de payares, pa presentase a la séptima edición del Concursu de Comic n’Asturianu “Comarca de la Sidra”. Nél pueden participar persones de cualquier nacionalidá, mayores de 14 años, con obres orixinales de tema y técnica llibre, con testos escritos n’asturianu. Los trabayos han entregase nel Serviciu de Normalización Llingüística de la Mancomunidá de la Comarca de la Sidra o nes Oficines d’Información Xuvenil de la comarca. Les bases completes podéis atopales na Web del Serviciu de Mocedá de la Comarca.

Pa quien nun la pudo ver nel reciente Festival del llibru infantil y xuvenil, la esposición al rodiu de la obra de Berta Piñán Arroz, agua y maíz va tar estes selmanes na casa la cultura-biblioteca Maria Josefa Canellada, en Santolaya (Cabranes).

Villaviciosa va acoyer, del xueves 15 d’ochobre al domingu 18, el primer Festival del llibru infantil y xuvenil n’asturianu, organizáu pola conseyería de Cultura y Turismu cola collaboración del gremiu d'editores d'Asturies, la Comarca de la Sidra y el conceyu de Villaviciosa. Esti eventu inclúi gran cantidá d’actividaes que van protagonizar l’axenda cultural de la Comarca pa esti fin de selmana. Va a haber esposiciones, presentaciones de llibros, talleres y actuaciones músicales (ente ellos los de Tejedor y Alfredo González), too ello nel PATIU DE LES ESCUELES GRADUAES, al par del teatru Riera. El programa completu podéis atopalu en www.lacomarcadelasidra.com.

Entá ta abiertu'l plazu pa los distintos concursos qu'entren dientro'l programa CREACIÓN, entamaos pol Serviciu de Mocedá de la Comarca de la Sidra col sofitu de Caxastur. Pal de curtiometraxes d'animación y el de microrellatos (al que pueden presentase testos en llingua asturiana) el plazu pieslla'l 30 d'esti mes. Hai un poco más de tiempu nel casu del de CÓMICS N'ASTURIANU, pal que se pueden presentar trabayos hasta'l 13 de Payares. Les bases completes de toos elles podéis consultales equí.

Per primer vez, esti añu'l pregón de les fiestes del Portal en Villaviciosa, a cargu del escritor Lluis Portal, foi pronunciáu dafechu n'asturianu. Podemos lleelu enteru nel blog del so autor.

La Compañía de Llangréu TEATRU KUMEN clausura güei, día 24, a les 20:30 na Sala Loreto de Colunga, los XIV ALCUENTROS COLA CULTURA TRADICIONAL D·ASTURIES cola escenificación de la obra "JACINTO Y MONCHINA"
L'espectáculu ye parte, al par, de la III Muestra de Teatru Amateur del Principáu d'Asturies que promueve la Federación de Grupos de Teatru Amateur d'Asturies (FETEAS) cola collaboración de la Conseyería de Cultura y Turismu y de dellos conceyos, como'l de Colunga.
Con 28 obres al llombu, depués de cuasi trenta años dende'l so aniciu, KUMEN ofreznos esta nueva puesta n'escena, protagonizada por Jacinto'l de Fresnéu, ún de los personaxes principales de "La Aldea Perdida", cola diferencia de que KUMEN pon a esti personax dientro d'una nueva hestoria, na que Jacinto ye un mozu ilustráu, zarráu nun pueblín asturianu, qu'escribe poesía y afux del trabayu en campu.

L’asociación Xareos! y la revista Formientu, en collaboración cola editorial La Cruz de Grau, convoquen el I Certame de Microrrellatos Mozos «Formientu» “col envís d’afalar la creación lliteraria ente los escritores más mozos y ayudalos a esplorar les sos posibilidaes”. El plazu ta abiertu hasta’l 31 d’agostu d’esti añu.

La escritura de microrrelatos mínimos ye, según los responsables de la revista Formientu, “ un exerciciu perfectu pa desendolcar esa capacidá de síntesis y suxestión capaz de impactar al llector y dexalu prendáu d’una historia”, ye por ello que convoquen esti concursu nel que puen participar toes aquelles persones nacíes de 1975 n’adelantre, con un númberu ilimitáu de microrrellatos, de tema llibre y escritos n’asturianu.

Lleer el restu d'esta entrada