el Solanu

La segunda edición el Día de les Ciencies Asturianes va celebrase'l próximu martes 10 de Payares, a partir de les doce hores nel salón de graos de la facultá de bioloxía. Esti añu va tar protagonizáu por Xosé María Fernández, biólogu que ganó l'añu pasáu'l premiu "Máximo Fuertes Acevedo" cola obra Homo Sapiens: la epopeya d'un llinaxe, obra que se va presentar al públicu dientro d'esta xornada, enantes de que'l so autor dea la conferencia ¿Onde tamos depués de venti años col xenoma humano.

Col envís d'editar un llibru-cartafueyu qu'antologue la lliteratura n'asturianu que se ta escribiendo anguaño na Comarca de la Sidra, el Serviciu de Normalización Llingüística de la Mancomunidá convida a tolos escritores de la comarca interesaos en participar a unviar les sos participaciones en forma de poesía (con una estensión perbaxo de los 100 versos) o rellatu breve (trés fueyes como máximu). Les collaboraciones han enviase per meil a normastur@lacomarcadelasidra.com, o bien per correu al Serviciu de Normalización Llingüística MAN.CO.SI. Paraes, nº47 33529.

Tovía hai plazu, hasta’l 13 de payares, pa presentase a la séptima edición del Concursu de Comic n’Asturianu “Comarca de la Sidra”. Nél pueden participar persones de cualquier nacionalidá, mayores de 14 años, con obres orixinales de tema y técnica llibre, con testos escritos n’asturianu. Los trabayos han entregase nel Serviciu de Normalización Llingüística de la Mancomunidá de la Comarca de la Sidra o nes Oficines d’Información Xuvenil de la comarca. Les bases completes podéis atopales na Web del Serviciu de Mocedá de la Comarca.

Pa quien nun la pudo ver nel reciente Festival del llibru infantil y xuvenil, la esposición al rodiu de la obra de Berta Piñán Arroz, agua y maíz va tar estes selmanes na casa la cultura-biblioteca Maria Josefa Canellada, en Santolaya (Cabranes).

Villaviciosa va acoyer, del xueves 15 d’ochobre al domingu 18, el primer Festival del llibru infantil y xuvenil n’asturianu, organizáu pola conseyería de Cultura y Turismu cola collaboración del gremiu d'editores d'Asturies, la Comarca de la Sidra y el conceyu de Villaviciosa. Esti eventu inclúi gran cantidá d’actividaes que van protagonizar l’axenda cultural de la Comarca pa esti fin de selmana. Va a haber esposiciones, presentaciones de llibros, talleres y actuaciones músicales (ente ellos los de Tejedor y Alfredo González), too ello nel PATIU DE LES ESCUELES GRADUAES, al par del teatru Riera. El programa completu podéis atopalu en www.lacomarcadelasidra.com.

Dientro del so programa de cursos d'alfabetización, l'academia de la llingua va entamar, en xunto cola Asociación Folklórica y Cultural Los Yerbatos, un cursu de llingua pa persones adultes en Bimenes. El cursu va impartise na casa la cultura de Santuyano del 6 d'ochobre al 3 d'avientu, los martes y los xueves de 18:00 a 20:00 hores, y ta abiertu a tolos interesaos, que namás tendrán que pagar los materiales didácticos.

El Conseyu de Gobiernu de la Universidá d'Uviéu ta acabante d'aprobar los cuatro títulos de grau nos que se dividirán dende esti momentu los estudios de la Facultá de Filoloxía, dientro del Espaciu Européu d'Educación Superior, ente los que s’atopa’l Minor d'Asturianu, que supón la primer titulación dientro de los estudios oficiales universitarios pa la llingua asturiana.

El Conceyu Universitariu pol Asturianu (CUPA), organización independiente asturianista y universitaria na que participen alumnos, personal d’alministración y servicios y vieyos alumnos y que cunta con representación nel Claustru de la Universidá d’Uviéu, espresó la so felicitación a la Universidá d’Uviéu “pola aprobación definitiva de los estudios d’asturianu”. El CUPA espera amás que nel futuru “los estudios d’asturianu sigan ampliando’l so espaciu, aspirando la organización a la creación futura d’un Grau de llingua asturiana”.

Amás, el CUPA, recuerda que ye’l momentu de crear, dientro de la Facultá de Filoloxía “un Departamentu propiu pa la Filoloxía Asturiana, qu’anguaño ta representada namás con un grupu d’investigación, el Seminariu de Llingua Asturiana”.

L’aprobación d’esti plan ye, dende'l puntu de vista del CUPA, “un pasu hestóricu pal asturianu, qu’entra per primer vegada dientro de les enseñances reglaes y oficiales universitaries”.

Fonte: Asturnews