el Solanu

Si güei vamos poder disfrutar de l'actualización del teatru costumista asturianu con "Ello yera una vez...", a cargu del grupu de teatru Carbayín, mañana vienres, tamién na Casa la Cultura de Santuyano y a la mesma hora (20.30), tóca-y el turnu a otru xéneru tradicional como ye'l monólogu, de la mano de Carlos Alba, un de los sos cultivadores más nomaos y anovadores d'anguaño, que va actuar depués de la entrega de premios del concursu cuentos.

Llicenciáu en periodismu y actor, Carlos Alba lleva bien d'años dedicando esta última faceta al xéneru monologüísticu, con pieces como la gran "Alonsomanía", na que yá apaecen dos de los sos personaxes más míticos: Cellero, el güelu rabión; y "el Pola", mozu quinqui y tarambaina. Na Matazuga fai Alba, al mou xuglarescu, un percorríu per diferentes narraciones de la tradición oral con un filu conductor descritu pol propiu autor:

"Cuando tenía 10 años, perdí la fala. Los mios padres llevaronme a mio güela pa que me "pasara l'agua", pero yera tantu l'agüeyamientu que tuvi que quedar con ella nel pueblu, n'El Cellero, que de neñu yera pa mí igual que'l mesmu paraísu. Naquellos nueve díes sentí les histories d'esti espectáculu, na mesma cocina, a la vera'l llar, cuntaes por esos paisanos y paisanes que son maestros de la tradición oral. Hata que pola mor d'una matazuga o matanza del gochu (de les d'antes, con duerna, berríes y sangre), dexé de tar agüeyáu".

Como muestra del so trabayu, podéis ver "El casu Falín", monólogu cómicu a la manera moderna nel qu'encarna a "El Pola":

Esbilla | del.icio.us

Dexar un comentariu