el Solanu

Güei, xueves 9 de xunetu, nel campu de fútbol de Grandiella, va celebrase la primer edición del recién creáu Festival de Pop-Rock Villa de Nava. Nél van tar presentes los grupos Dirección Sur, Delagua, Muñeco Vudú y Alto Volto.

Dirección Sur ye una banda de pop liderada pola cantante Ana Hevia y el guitarrista Víctor Magadán que ta presentando en directo los temes que componen el so últimu discu hasta’l momentu, tituláu "A sólo un pasu". Delagua son una banda de pop-rock fusión creada hai nueve años poles hermanes Gema y Silvia Fernández, que faen una mezcla de dellos estilos (pop, rock, reggae, rumba, funk, etc.) y que tienen espublizaos dos discos, l’últimu col nome de "De frente nesti mesmu añu". Muñecu Vudú son un quintetu que vien trabayando dende l’añu 2007 y que basa la so música na mezcla de rock, funk y otros ritmos del mundu (rock, swing, reggae…); d’equí a poco van escomenzar una xira pel Estáu. Alto Volto son un tríu de hard rock influenciáu principalmente por bandes ingleses y americanes de los 70 y 90.

Esti I Festival de Pop-Rock Villa de Nava enmárcase dientro de los actos previstos nel programa del XXXII Festival de la Sidra, que va celebrase’l fin de selmana que vien y nel que tamién s’inclúi deporte na cai, teatru, concursu de rellatos curtios, campeonatu de bolos, exhibición de graffitis o concursu d’echadores de sidra.

Fonte: Estaya d'Asturianu RTPA y Conceyu de Nava

Esbilla | del.icio.us

Dexar un comentariu